Известување

konf_za_pecatПочитувани членови,

Синдикатот на Одбраната и Безбедноста (СОБ) на ден 26.07.2016 година одржа конференција за печатот на која уште еднаш ги посочи напластените проблеми во МО и АРМ и побара итно решавање на истите во насока на подобрување на стандардот на вработените во МО и АРМ.

Ви го пренесуваме интегралниот текст од конференцијата за печатот:

„Синдикатот на Одбраната и Безбедноста (СОБ) заедно со Независниот синдикат на професионални војници (НСПВМ) веќе подолг временски период се обидува преку социјален дијалог со надлежните лица во Министерството за одбрана да изнајдат решенија за проблемите со кои секојдневно се среќаваат припадниците на Армијата на Република Македонија и Министерството за Одбрана.

За жал, наместо решавање на проблемите кои секојдневно се повеќе и повеќе се зголемуваат, истите во недостаток на добро менаџирање со ресурсите едноставно се „сокриваат под тепих”, се заташкуваат или е забрането да се зборува за нив.

Овој балон на напластени проблеми веќе пукна, припадниците на АРМ и МО се доведени до ивица на егзистенција алудирајки на паричните примања во вид на основна плата која е толку ниска што со право се поставува прашањето – Дали на Република Македонија и треба Армија која ќе го брани суверенитетот и интегритетот на нашата држава???

Секако овдека пред се се мисли на односот на политиката односно владата кон вработените во АРМ и МО, кој однос едноставно би го опишале како однос на мајка према вработените во МВР и маќеа кон вработените во АРМ и МО.

Како да не беше доволно тоа што припадниците на АРМ и МО се доведени во категорија на социјални случаеви, Министерството за Одбрана се „потруди” да го прекине и организираниот превоз за доаѓање на работа во касарните низ Р. Македонија.

Имено, веќе десетина дена скоро половината од организираниот превоз за доаѓање и одење од работа е во прекин и припадниците на Армијата на Република Македонија се приморани сами да се снаоѓаат и да доаѓаат на работа трошејќи свои парични средства кои со оглед на досегашното искуство на плаќање на МО, ќе им бидат надоместени после неколку месеци.

Тоа значи дека НИЕ – припадниците на Армијата на Република Македонија ќе треба неколку месеци да го финансираме Министерството за Одбрана, надевајки се дека надлежните структури ќе се потрудат да решат бар дел од огромните проблеми во  МО и АРМ, односно ќе ја постават професијата „ВОЈНИК” на пиедесталот кој заслужено им припаѓа.

Зарем сеуште е потребно да потсетуваме и да укажуваме дека припадниците на АРМ и МО се еден од носечките столбови на државата, Република Македонија, дека се најдобрите амбасадори на Македонија во светот каде со својот докажан професионализам и патриотски чувства се носат рамо до рамо со останатите моќни армии во светот при извршувањето на поставените задачи. Со нашиот професионален ангажман на јужната граница на нашата држава ја одбранивме Европската унија од напливот на бегалци и покрај  несоодветните услови за живот и работа, припадниците на МО и АРМ чесно, пожртвувано, коректно и професионално ги извршуваат секојдневно поставените задачи и успешно се справуваат со предизвиците што притискаат на границите на нашата држава.

Овде би ги спомнале и постојаните доцнења на исплати по основ на дневници, патни трошоци, закупнини кои не се исплатени од месец Март 2016 год.

Поради сето ова, бараме, веднаш да се решат овие суштински проблеми, веднаш да се изврши зголемување на платата од 20%, веднаш да се реши проблемот со организираниот превоз, веднаш да се изврши исплата на заостанатите дневници, патни трошоци и закупнини.

Нерешавањето на овие прашања го доведува во прашање функционирањето на МО и АРМ а со тоа се довeдува и во прашање навременото извршување на нашата мисија, односно обезбедување на безбедна и стабилна Република Македонија”.

Нерешавањето на напластените проблеми ќе резултира со организирање на генерален штрајк на вработените во Армијата на Република Македонија и Министерството за Одбрана.

Со почит, Синдикат на одбраната и безбедноста

Share

ПРОТЕСТ НА СИНДИКАТОТ НА ОДБРАНАТА И БЕЗБЕДНОСТА

Почитувани членови,

И покрај нашите обиди преку разговори и преговори односно преку социјален дијалог да овозможиме подобрување на стандардот на вработените во МО и АРМ, односно зголемување на платите на вработените во МО и АРМ сепак Министерството за одбрана и Владата на Република Македонија не пристапија со сериозност кон решавање на основното право т.е. правото за достоинствен живот на нашите фамилии.

Барањата за:

  1. Зголемување на платите од 20 % во ова фаза а потоа нашите плати да го следат изедначувањето на платите со припадниците на полицијата и царината;
  2. Изедначување на висината на дневницата со припадниците на полицијата (висина од 1.200,00 денари)

и понатаму се игнорираат од страна на Министерството за одбрана и Владата на Република Македонија.

Поради таквиот игнорантски однос, членовите на Синдикатот на одбраната и безбедноста поддржани од Независниот синдикат на професионални војници, својот револт го искажаа на ПРОТЕСТ кој се одржа на ден 21.05.2016 година (сабота), во 12:00 часот пред зградата на Министерството за одбрана и Владата на Република Македонија.

Би сакале да им се заблагодариме на сите членови на СОБ кои и покрај големите притисоци од стана на раководните структури во МО и АРМ да не се излегува на протест, сепак излегоа и храбро и достоинствено како што доликува на нашата професија, во свое име и во името на сите останати вработени во МО и АРМ го искажаа своето огромно незадоволство и разочарување од немањето на слух на преставниците на власта.

Борбата за нашите права не застанува тука, доколку во наредниот период Министерството за одбрана и Владата на Република Македонија не го преиспитаат својот однос и не пристапат кон решавање на нашите барања, Синдикатот на одбраната и безбедноста повторно ќе организира протест, односно ШТРАЈК на вработените во МО и АРМ.

Ги повикуваме сите членови на СОБ и останатите вработени во МО и АРМ, да не се плашат, да излезат да ПРОТЕСТИРААТ односно да ШТРАЈКУВААТ, затоа што само ЕДИНСТВЕНИ и СЛОЖНИ можеме да се избориме за подобри права, за подобар стандард, за достоинствен живот, за повисоки плати и надоместоци на плати, за подобрување на работните услови, за подобрување на стандардот на вработените во МО и АРМ, за подобрување на квалитетот на животот на нашите фамилии, за подобра иднина на нашите деца.

Со почит, Синдикат на одбраната и безбедноста

Share

ИЗВЕСТУВАЊЕ

sob_logo_bmp2Почитувани членови,

Синдикатот на Одбраната и Безбедноста (СОБ) како социјален партнер на Министерството за одбрана подолг временски период одржуваше преговори со надлежните лица во Министерството за одбрана, во насока на подобрување на стандардот на вработените, односно зголемување на платите на вработените во МО и АРМ.

И покрај нашите обиди за подобрување на стандардот на вработените во МО и АРМ, односно зголемување на платите на вработените во МО и АРМ, не дојдовме до решение по пат на преговори односно преку социјален дијалог со Министерството за одбрана, па затоа на прес конференцијата одржана на ден 05.05.2016 година, органите и телата на СОБ до владата на Р. Македонија ги упатија следните барања:

  1. Зголемување на платите од 20 % во ова фаза а потоа нашите плати да го следат изедначувањето на платите со припадниците на полицијата и царината.
  2. Изедначување на висината на дневницата со припадниците на полицијата (висина од 1.200,00 денари).

Како разумен социјален партнер оставивме доволно време (до 13.05.2016 год.) да седнеме на преговарачка маса и да најдеме начин за исполнување на горе наведените барања. За жал, до крајниот рок 13.05.2016 год. ниту владата на Р. Македонија ниту Министерство за одбрана не покажаа доблест да разговараат за проблемите со кои се среќаваат припадниците на МО и АРМ, односно не покажаа ниту елементарен слух за решавање на напластените проблеми.

Со оглед на таквата ситуација, органите на СОБ донесоа ОДЛУКА да се превземат активности (согласно Законските прописи и Колективниот договор на Министерството за одбрана) за остварување на своите права од работен однос т.е членовите на Синдикатот на Одбраната и Безбедноста својот револт ќе го искажат најпрво на ПРОТЕСТ кој ќе се одржи на ден 21.05.2016 год. (сабота) со почеток во 12 часот пред Министерството за Одбрана и Владата на Р. Македонија, а потоа доколку продолжи игнорантскиот однос и со ШТРАЈК во институциите кои ги опфаќа Синдикатот на Одбраната и Безбедноста.

Почитувани членови на СОБ, синдикалната борба почива на идеалот за солидарност и меѓусебно подржување. Во таа насока со задоволство Ве известуваме дека подршка за остварување на заедничките права од работен однос ни укажаа и колегите од Синдикатот на професионалните војници кои ќе ни се придружат на најавениот протест.

Сметаме дека е крајно време да го кренеме нашиот глас и да кажеме СТОП, СТОП ЗА ДЕВАЛВИРАЊЕТО НА НАШАТА ПРОФЕСИЈАТА.

Ги повикуваме и останатите колеги, вработени во МО и АРМ, ДЗС и ЦУК што помасовно да ни се приклучат на најавениот протест, и сите заедно да го искажеме огромното незадоволство кое долг период тлее во нас самите, да покажеме дека нашиот професионализам и беспрекорното извршување на поставените безбедносни задачи во мир и во вонредни ситуации заслужува соодветно респектирање од страна на власта во Р. Македонија, затоа што нашата синдикална борба за подобрување на стандардот се однесува на сите вработени.

Со почит, Синдикат на одбраната и безбедноста

Share

Известување до членовите на Синдикатот на одбраната и безбедноста

Почитувани членови на Синдикатот на Одбраната и Безбедноста (СОБ). Ве известуваме дека СОБ како социјален партнер на Министерството за одбрана подолг временски период одржуваше преговори со надлежните лица во Министерството за одбрана, во насока на подобрување на стандардот на вработените, односно зголемување на платите на вработените во МО и АРМ.

И покрај нашите обиди за подобрување на стандардот на вработените во МО и АРМ, односно зголемување на платите на вработените во МО и АРМ, не дојдовме до решение по пат на преговори односно преку социјален дијалог, па затоа органите на СОБ одлучија да се превземат активности согласно Законските прописи и Колективниот договор на Министерството за одбрана во насока на зголемување на платите, затоа што сметаме дека моменталната состојба со висината на платата на вработените во МО и АРМ е на најниско ниво од формирањето на МО и АРМ, односно со платата не можат да се задоволат ни најосновните елементарни потреби за пристоен живот на припадниците на МО и АРМ и на нивните семејства.

Како што знаете, НИЕ, припадниците на МО и АРМ во извршувањето на своите задачи во Република Македонија и надвор од неа, постојано покажуваме дека секогаш сме едни од најдобрите професионалци како припадници на безбедносните структури во Р.Македонија. Тоа може најдобро да се види и при сегашното наше ангажирање во обезбедувањето на јужната граница на нашата земја при контрола на бегалската криза, каде што и покрај несоодветните услови за живот и работа добиваме дневница во висина од 610,00 денари, додека дневницата за припадниците на МВР е 1200,00 денари.

Иако граничното обезбедување е задача на МВР (кои и бројчано се побројни од нас), се покажа дека во вакви кризни ситуации без припадниците на МО и АРМ обезбедувањето на државната граница неможе да се реализира во целост. Ова е доволен показател зошто бараме изедначување на платите и надоместоците на плати со припадниците на МВР.

Исто така сведоци сме дека во изминатиот период извршено е зголемување на платите на полицијата, царината, судиите, судските службеници, медицинскиот персонал, зголемување на минималната плата, пензиите, како и зголемување на паричните примања на разни групи на работници.

Сметаме дека Владата на Р.Македонија неправедно не изоставува НАС, припадниците на МО и АРМ во однос на зголемувањето на платите и поради тоа раководството на  СОБ до владата на Р.Македонија ги упати следните барања:

  1. Зголемување на платите од 20 % во ова фаза а потоа нашите плати да го следат изедначувањето на платите со припадниците на полицијата и царината.
  2. Изедначување на висината на дневницата со припадниците на полицијата (висина од 1.200,00 денари).

Синдикатот на Одбраната и Безбедноста преку прес конференцијата која се одржа на ден 05.05.2016 година се обрати до Владата на Р. Македонија и побара средба на која би се разговарало за решавање на горенаведените барања. Доколку не дојде до средба до 13.05.2016 година, Синдикатот на Одбраната и Безбедноста својот револт ќе го искаже  најпрво со протести, а потоа и со штрајк во институциите кои ги опфаќа СОБ.

Со почит, Синдикат на одбраната и безбедноста

Share

Финален завршен состанок за синдикални изборни активности на СВЦУК

Синдикатот на вработените во Центарот за управување со кризи, СВЦУК, ги заокружи и ги заврши своите внатрешни синдикални изборни активности со давање доверба за нов мандат на досегашното раководство на СВЦУК. Членовите на синдикатот му дадоа над 80 проценти поддршка на предложеното раководство, кое и до сега, беше волонтерски на функција, во состав: Илија Бојаровски – претседател, Иван Митевски – потпретседател и Газмен Шерифи, секретар.

Финалниот завршен состанок за синдикални изборни активности – изборно Собрание на СВЦУК – Синдикатот на вработените во Центарот за управување со кризи на Влада на Р. Македонија, се одржа на средината од април, 14.04.2016, при што се верификуваа и официјализираа, резултатите од веќе пристигнатите елктронски (а и во печатена форма) и/или преку пошта предлози и поддршка за кандидати за претседател, потпретседател и секретар на СВЦУК.

Илија Бојаровски, на состанокот, го поздрави присуството и соработката на претседател на СОБ, Ристо Ајтов, истовремено, поздравувајќи ги присутните и од службено отсутниот потпретседател на СВЦУК, Иван Митевски, кој беше на службена задача во друг град. При кусо навраќање кон целта на состанокот, тој потсети за целокупните изборни активности координирани со СОБ, што траеа речиси еден месец (од 18.03.2016): прво со координирање и конкретизирање на еден можен предлог за Раководство при крајот на март 2016-та, а потоа со поинтензивни 15-дневни активности по Одлуката на Претседателството на СВЦУК од 31.03.2016 за спроведување на „е-избори“, без трошење на финансии, со финален завршен состанок во рок од 15 денови. Притоа, секој член на Синдикат имаше можноста да се изјасни по предлог за Раководство или да даде предлог до сите членови веднаш по приемот на електронската порака, а со можност и да бара поддршка, преку лично изјаснување преку е-маил (во термин, прво од 1 до 7 април, а и со можност и за повторно изјаснување од 8 до 14 април, во случај, ако одреден прелогот за Раководство нема добиено 51% поддршка од вкупниот број членови).

Инаку, на Финалниот завршен состанок на Собранието на СВЦУК, при почетокот, беше изразена симболична едноминутна почит, со молчење, на нашиот прерано починат колега, Илчо Паужинков од РЦУК Свети Николе.

Share

Известување

sob_logo_bmp2Синдикатот на Одбраната и Безбедноста (СОБ) како социјален партнер на Министерството за одбрана подолг временски период одржува преговори со надлежните лица во  Министерството за одбрана во насока на подобрување на стандардот на вработените, односно зголемување на платите  на вработените во МО и АРМ.

Имено, сметаме дека моменталната состојба со висината на платите на вработените во МО и АРМ е на многу ниско ниво, односно со таквата плата не можат да се задоволат основните елементарни потреби за пристоен живот.

Би сакале да истакнеме дека припадниците на МО и АРМ во извршувањето на своите задачи во Република Македонија и надвор од неа, покажаа дека секогаш се едни од најдобрите професионалци како припадници на безбедносните структури во Р. Македонија. Тоа може најдобро да се види и при сегашното ангажирање во обезбедувањето на јужната граница на нашата земја при контролата на бегалската криза, каде што и покрај  несоодветните услови за живот и работа, припадниците на МО и АРМ чесно, пожртвувано, коректно и професионално ги извршуваат секојдневно поставените задачи и успешно се справуваат со предизвиците што притискаат на границите на нашата држава.

За жал останатите припадници од безбедносниот сектор (полиција, царина и други безбедносни структури) имаат повисоки примања од нас, благодарејќи на најавеното и реализирано зголемување на нивните плати. Сведоци сме дека за припадниците на полицијата веќе трет пат е најавено зголемување на нивните парични примања, односно изедначување на платите помеѓу секторите полиција и царина. Овде би сакале да го споменеме и последното зголемување на платите на медицинскиот персонал, зголемувањето на минималната плата, зголемувањето на пензиите, како и зголемувањето на паричните примања на одредени групи на работници во Р. Македонија.

Сметаме дека Владата на Р. Македонија неправедно ги изостави припадниците на МО и АРМ во однос на зголемувањето на платите и поради тоа бараме веднаш да се изврши зголемување на платите на припадниците на МО и АРМ за висина која ќе овозможи нивелација односно изедначување по структура со платите на припадниците на полицијата и царината односно:

  • Зголемување на платите од 20 % во ова фаза и потоа нашите плати да го следат изедначувањето со платите на припадниците на полицијата и царината.
  • Изедначување на висината на дневницата со припадниците на полицијата.

Сметаме дека согласно финансиските можности на Р. Македонија, од буџетот на Р. Македонија може да се издвојат дополнителни финансиски средства со кои што ќе се изврши бараното зголемување на платите, а кои што финансиски средства нема да претставуваат голем товар врз буџетот.

 

Со почит, Синдикат на одбраната и безбедноста

Share